رواية دمر حياتي الفصل الثالث عشر 13 بقلم خيال كاتب
الجزء الثالث عشر
.....................
بعد ما لبست هدومي وطارق لبس هدومه خرج قعد علي مكتبه وضرب الجرس ودخل راجل ضخم قاله خلي البنت سميحه تطلع لينا عشاء وبصلي وقالي تحبي تتعشي ايه
انا :: لا انا مش جعانه
طارق :: لا مينفعش ها .. اجيب مشويات ولا نفسك في ايه
انا :: اي حاجه
طارق :: خلي البت سميحه تطلعلنا شوية كباب علي كفته وخليها تروش الدنيا
الضخم :: امرك يا بوص
طارق قاعد علي مكتبه وبيراقب الصاله وكل شويه يعمل زوم علي الطرابيزات .. الطربيزات اللي فيها بنات تبعه وشوفت شيماء قاعده مع راجل باين من لبسه انه خليجي وعماله تتدلع عليه
طارق :: عايزك تراقبي وتتعلمي علشان كلها يومين وهتبقي قاعده علي طرابيزة من دول
انا :: حاضر يا طارق
طارق :: انا هنا الكل بيندهلي ب بالبوص
انا :: حاضر يابوص
سميحه دخلت بالأكل .. كانت واحده بيضه وشعرها اصفر وتقريبا في جسم غاده عبد الرازق ولبسها فاضح جدا
سميحه :: الأكل وصل يابوص
حطيه عندك علي الطرابيزه وهاتي من جوا الكاسات وازازة البيره
وراح بصلي. الأكل اصله ميتبلعش من غير البيره المشبره
انا ابتسمت وانا مش عارفه ارد لاني متعودتش اصلا علي الشرب
طارق :: اعرفكم ببعض دي سميحه .. شغاله معانا والمزه اللي مسؤله عن طلباتي بخلاف شغل المحل
انا :: اهلا وسهلا
طارق :: ودي بقي يا سميحه سهام .. مزه جديده وهتشتغل معانا وهتبقي مسؤليتك من بكره تعلميها وتخليها برنسيسه كدة زيك
سميحة :: حاضر يابوص انت تؤمر
طارق :: طيب تقدري انتي تروحي .. طربيزه 12 انا شايف عليها راجل شكله متريش .. روحي جسي النبض وشوفي شغلك
سميحة :: ماشي يابوص .. واكيد هتعرف عليكي بكره ياسهام باي
طارق :: يلا بقي نروح نتعشي لحسن انتي هديتي حيلي
ابتسمت وقومت اكلت معاه وبقي بيصبلي كل شويه كاس بيره وانا باكل
خلصت اكل ومبقتش عارفه انا المفروض هقعد معاه للصبح ولا همشي .. ولو مشيت همشي ازاي في الوقت المتأخر ده لان الساعة دخلت علي 12
طارق عرفني من نظره واحده وفهم اللي بيدور في دماغي
ضرب الجرس دخله نفس الراجل الضخم وقاله ابعتلي سمير السواق حالا
الضخم خرج ومفيش دقايق كان السواق بتاع طارق جه قالوا عايزك توصل سهام للمكان اللي تقولك عليه وترجع تديني تمام
وصلت البيت وكانت ماما صاحيه وقلقانه عليا واول ما سمعت صوت الباب ندهتلي
دخلت ليها الأوضه
ماما :: ايه يابنتي اللي اخرك لغاية دلوقت
انا :: مش علي ماروحت ياماما وقعدت مع الراجل واتكلمنا
ماما :: ايه الريحة دي .. انتي ريحتك كلها سيبرتو ليه
انا :: اه اه مش مستشفي ياماما وانا وقفت معاه وهو بيكشف علي المرضي وبيديهم حقن علشان اتعلم
ماما :: مانتي يابنتي بتعرفي تدي حقن انتي لسة هتتعلمي
انا :: لكن هو ميعرفش ياماما وانا كنت بقولوا حاضر ونعم وخلاص
ماما :: خدي بالك من نفسك يابنتي انا لو عشت النهارده بكره مش هكون عايشه
انا :: ليه بتقولي كدة بس يا ماما ربنا يخليكي لينا
......... في الكباريه ..........
شيماء راحت ل طارق في مكتبه اللي في اول دور ودخلت
شيماء :: ايه رأيك يا بوص في سهام
طارق :: لا البت جامده وهيجي منها
شيماء :: طب ما كده بردو هتتعبنا في الأول
طارق :: ليه ؟؟
شيماء :: البت لسه بنت بنوت وانت عارف شغلتنا دي ... انا لسة هقولك انت يابوص
طارق :: ههههههههههههه وحط رجليه علي المكتب وولع السيجار .. اخد نفس ونفخه لفوق ونزل رجليه من علي المكتب وقام من المكتب وراح ل شيماء ووقف وراها ووطي علي ودانها وبسخريه
البت مالها يا شوشو
شيماء بأستغراب بنت بنوت ... ايه ؟
طارق :: هههههههههه بنت بنوت هههههههههههه
البت دي خبره و.......... يا شوشو
شيماء ::....... ؟ ازاي
طارق :: ازاي ؟ ... ابقي اسأليها انتي بقي ازاي ده مش موضوعي انا كنت ناوي ابعتلك قبل ما تجيلي بدقيقه واحده
شيماء :: خير
طارق :: انتي كنتي حكيتيلي علي ظروفها الماديه
شيماء :: ايوة ظروفها مسح خالص
طارق :: طيب بكره تاخديها للمحل بتاعي اللي في فيصل وانا هكلمهم في المحل تاخد اللي عيزاه من ملابس علشان لبسها اللي كانت لابساه مينفعش هنا
شيماء :: طب وانا يابوص مخدليش طقم ولا اتنين
طارق :: ابقي نقيلك طقمين مفيش مشكله
وبعد ما تاخد اللي هي عيزاه تجيبي ليها كام جزمه من المحل اللي جنبي وانا هبقي احاسبهم
شيماء :: وانا كمان عايزه جزمتين
طارق :: يابنتي بطلي ام الاستغلال بتاعك ده .. عموما ماشي
شيماء :: هههههههههههه ربنا يخليك لينا يابوص
طارق :: طب يلا مع السلامه انتي روحي شوفي شغلك.. اه البت ليلي ابعتهالي
شيماء :: ليلي قاعده مع زبون علي طربيزه 5
طارق عمل زوم علي طربيزه خمسه وفعلا ليلي كانت قاعده مع زبون باين من شكله انه رجل اعمال واول مره يشوفه
طارق :: الزبون ده جديد ... خلاص سيبيها .. ليلي شاطره وهتعرف تظبط الزبون
....................
تاني يوم صحيت علي الساعة 11 وكنت مصدعه اوي بسبب الشرب بتاع امبارح دخلت الحمام غسلت وشي وبعدين عديت علي ماما لقيتها صاحيه
انا :: صباح الخير ياماما
ماما :: صباح الخير يابنتي
انا :: عاملة ايه النهارده
ماما :: اهو كويسه وبعمل التمارين بتاعة ايدي ورجلي
نسيت اقولكم ان ماما بتتكلم بس بطريقه صعبه بسبب الشلل اللي جالها بسبب الجلطه بس انا فاهمه هي بتقول ايه وكلامها رغم صعوبتها وهي بتنطق الا ان كلامها مفسر ومفهوم
انا :: انا هروح اعمل فطار وبعد كده هتصل بالمركز واحاول اخلي الجلسات بدري شويه
علشان ميعاد شغلي
ماما :: ماشي يابنتي وربنا يقويكي عليا وعلي شغلك ويعينك ويرزقك
روحت عملت فطار واتصلت بمركز العلاج الطبيعي
وظبطت معاهم ميعاد تاني يتناسب مع ظروف شغلي الجديد
وبعد ما خلصت المكالمه دخلت الفطار لماما وفطرنا سوا
الساعة اتنين اتصلت بيا ايمان علشان تطمن عليا وعرفت منها انها نزلت شغل في محل ملابس تاني وان عاطف قرب يفتح المحل بتاعه من جديد بس قدامه لسة شويه
بتاع شهر كده
وانا بكلم ايمان جالي اتصال من شيماء
خلصت مع ايمان وكلمت شيماء
قالتلي انها هتعدي عليا علشان هنروح فيصل هنجيب لبس من محل طارق اللي هناك وعلي حسابه
قولت ليها خلاص ماشي
دخلت لماما وقولت ليها ان شيماء صاحبتي
عايزني انزل معاها نشتري ليها لبس علشان مبتعرفش هي تنقي وماما قالتلي ماشي بس متتأخريش
لبست هدومي وشيماء عدت عليا ومشينا
روحنا ودخلت المحل اللي كان باين من شكله من بره ومن جوه ان اسعاره خياليه
لانه محل فخم جدا
دخلت واول ما شيماء بلغتهم اننا تبع طارق اتصلو بيه وهي كلمته وهو كلم الشاب اللي كان واقف معايا وبعدين الشاب قالي اختاري يامدام الهدوم اللي تعجبك
بصيت له بضيق جدا انه قالي مدام وقولت له انسه يا خويا
دخلنا نقينا الهدوم وطبعا كانت كلها ملابس فاضحه جدا وكنت كل ما اعترض علي طقم شيماء تقولي لا حلو وهو ده المطلوب
خرجت من المحل وانا محمله ليا اربع اطقم
واحنا خلاص مروحين وخارجين من المحل قولت لشيماء انا مش هينفع اروح بالهدوم دي
شيماء :: لا ما احنا مش هنروح بيها احنا هنعدي علي الكازينو نحط هدومنا دي في الاوضه بتاعتنا وكل يوم هنخرج بلبس محترم وفي الكازينو هنغير هدومنا بهدوم الشغل
انا :: اه كده احسن بردو
شيماء :: طيب يلا بينا ياختي
روحنا الكباريه ودخلت الأوضه اللي هتبقي بتاعتي مع شيماء وسميحة وكانت اوضه جميلة والبنات حاطين صورهم بحجم كبير
شيماء :: ده بقي هيبقي سريرك
وهدومك هتحطيها في الدولاب ده ومفتاح الدولاب ده هتلاقيه فوق منه لانه كان بتاع البت ساره بس دي خلاص سابت هنا واتجوزت راجل مريش
طلعت علي كرسي وبصيت فوق الدولاب لقيت المفتاح فعلا فتحته وحطيت فيه الهدوم واخدت المفتاح وحطيته في البوك بتاعي
مشينا من الكباريه وروحت البيت
الساعة 6.30 بالليل اخدت ماما مركز العلاج الطبيعي علشان تاخد جلستها وبعد ماخلصت الجلسه علي 8 اخدتها وروحت
الساعة 10 دخلت اخدت حمام ولبست هدومي واتصلت ب
شيماء علشان نمشي
واتقابلنا انا وهي علي اخر الشارع .. ركبنا تاكسي وروحنا الكباريه
وزي ما حصل امبارح حصل الليلة .. قعدت انا وطارق وبقي بيعلمني المفروض اعمل ايه
واخلي الزبون يطلب اغلي انواع الخمور ازاي
وبعد ما شربت اخدني في الأوضه اللي في المكتب وبعد ما خلصنا نده علي سميحه وقالها خدي سهام الصاله علشان تشوف بعيونها ازاي البنات بتتعامل مع الزباين
ونبهت عليا ان الكباريه كلة متراقب بالكاميرات يعني سرقه الزباين ممنوعه محاولة انك تاخدي فلوس ومتعرفيش بيها ادارة الكباريه بردو ممنوعه .. هنا كل اللي بيجيلك من الزباين ليكي نسبة فيه
وحتي لو زبون طلبك بره بتروحي معاه بس بتروحي تبلغي قبل ما تمشي .. واللي بتاخديه الكباريه بيكون له نسبه فيه
سميحة :: انا هلف كام لفه كده وهبعتلك شيماء تقعد معاكي وتفهمك الدنيا هنا ماشية ازاي
انا :: ماشي
وقفت اتفرج علي الصاله وبصراحه بقي مقولكمش عليها .. طربيزات كتير .. كل طرابيزه عليها اربع كراسي والطرابيزه عليها حاجة كده زي فانوس جواه لمبه منوره الوان .. فيه الاحمر وفيه الازرق وفيه الاصفر والاخضر .. السقف عباره عن زجاج ونازل منه كوره كبيره مدوره ومصنوعه من الزجاج الملون كلها منوره
الصاله عباره عن الوان بتطفي وبتنور والموسيقي كانك في استديو بسبب السماعات الكبيره اللي مش باين مكانهم لكن صوتهم بيجلجل .. ومطربين بيقدموا نمر ورقصات بترقص والبنات اللي علي كل طرابيزه بنت واتنين علي حسب رغبة ومزاج الزبون
قعدت علي طربيزه وبقيت بتفرج علي الرجاله اللي مبسوطه والبنات اللي بتدلع والمسخره اللي في كل مكان حواليا وانا حاسة من جوايا اني في مكان غلط مش مكاني
لا تربيتي ولا اخلاقي .. بس اخلاق ايه ما خلاص انا قلعت توب الأخلاق من يوم ما اتخطبت للي ربنا ياخده اللي اسمه سيد
وكان هو سبب كل اللي انا فيه ده
يمكن لو مكنش اغتصبني وخد شرفي كنت حافظت علي نفسي وعلي شرفي مهما كانت الظروف .. سرحت لغاية ما لقيت ايد بتتحط علي كتفي وصوت حاسه اني سمعته قبل كدة .. بت يا سهام ايه اللي جابك هنا
لفيت بوشي علشان اشوف مين ده اللي يعرفني وكانت المفاجئه اللي شلتني
الواد ابراهيم ابن خالتي نصره اللي ساكنين فوق مننا
اول ما شوفته كان نفسي الأرض تتشق وتبلعني وبقيت مصدومه .. عمري ما كنت اتخيل ان ابراهيم هيكون هنا .. ولا هو كمان عمره ما كان يصدق ان سهام البت المتربيه
ممكن يشوفها هنا
شيماء جت بسرعه ايه يا هيما مالك
ابراهيم :: ايه ده ياشيماء ؟ مين اللي جاب سهام هنا
شيماء :: تعالا عيزاك يا هيما .. وانتي يابت اقعدي واطلبي حاحة تشربيها
قعدت وبقيت عماله الطم علي وشي وكل شويه ابص علي ابراهيم وعلي شيماء وهي بتتكلم معاه وارجع الطم علي وشي
وقولت خلاص انا كده اتفضحت
بعد شويه شيماء جت وندهت علي هيما وقالت له هاتلنا كاسين وسكي يا هيما
هيما :: حاضر يا ست شوشو .. وراح مخبط ايد علي ايد
انا :: هو ايه اللي جاب ابراهيم هنا
شيماء :: ابراهيم شغال هنا من ست شهور
انا :: شغال هنا يامصيبتي يا مصيبتي
شيماء :: مالك يابنتي فيه ايه .. مالك خايفه ومرعوبه كده ليه
انا :: نعم ياختي بقالوا قد ايه ؟ ولما هو شغال بقالوا ست شهور هنا مقولتليش ليه
ابراهيم :: الوسكي يا ست شيماء .. اتفضلي يا برنسيسه سهام
ابراهيم كان بيتكلم بسخريه لانه اتصدم في سهام وبعد ما حط الوسكي علي الطربيزه قدام سهام وشيماء
سهام :: شايفه بيتكلم ازاي .. ولسه لما يقول لمامته ول باباه
شيماء :: يقول لمين انتي هبله ؟ يابنتي محدش يعرف ان ابراهيم شغال هنا وهو اصلا هو خايف اكتر منك انه يتعرف
انا :: ياسلام ياختي .. ثم انتي ليه معرفتنيش من الاول ان ابراهيم شغال هنا .. هو انتي مش عارفه انه ساكن فوق مننا
شيماء :: عارفه ومكنش ينفع اقولك علشان لو كنت قولتلك مكنتيش هتشتغلي .. وانا عامله علي مصلحتك .. متحطيش ابراهيم في دماغك وانسي خالص انك تعرفيه
هو ميقدرش يفتح بوقه
انا :: انا مش هاجي هنا تاني .. وهقوم امشي
شيماء :: تفتكري لما هتمشي هو كده خلاص مش هيظن فيكي الظن اللي ظنه... ما خلاص شافك واللي حصل حصل .. استهدي كده واشربي كاسك
شوية وجه واحد من زباين المحل سلم علي شيماء
:: ايه يا شوشو
شيماء ::محسن بيه .. اتفضل
محسن :: بصوت واطي وميل علي ودان شيماء مين يابت المزه الجامدة دي
شيماء :: دي جديده في المحل .. اصبر بس عليها يومين وانا هخليك تدوق
محسن :: بصوت واطي ماشي يا شوشو
ورجع علا صوته مش تعرفينا بالجميل يا شوشو
شيماء :: سهام صاحبتي وشغاله معانا في المحل جديده يعني
محسن :: عاشت الأسامي يا سهام.. خد يابني تعالا شوف البرنسسات دول يشربوا ايه
شيماء :: مانت عارف يا محسن
محسن :: هات ازازة شامبنيا يابني ولا الجميل عايز حاجه تانية
اللي اسمه محسن بيكلمني وانا مش عارفه اتعامل معاه ازاي وكانت شيماء هي اللي علي طول بترد علشان عارفه اني لسه متأقلمتش علي الجو هنا........
يتبع __________________________________________
